Recomendacións de verán

Aquí deixamos algunhas recomendacións para este verán, esperamos que sexan do voso agrado.

Recomendacións Verán 2019

Leer más publicaciones en Calaméo

II Marco numérico

Marco Numérico é a publicación de investigación matemática do IES Marco do Camballón (Vila de Cruces), onde se recollen traballos realizados por alumnado de ESO e BAC.

O segundo volume de Marco Numérico acaba de saír do prelo. A publicación (de periodicidade anual e xurdida no curso 2017-18 a iniciativa do Departamento de Matemáticas do IES Marco do Camballón) quere recoller traballos de investigación realizados por alumnado de secundaria e bacharelato de centros de ensino galegos que teñan as matemáticas como eixo central. Os traballos, suxeitos aos estándares de rigor e forma propios do ámbito académico, deben ser orixinais en canto á metodoloxía empregadas, coidar a formulación e contraste de hipótesis e a elaboración de conclusións propias. A temática dos artigos é libre, podendo abordar asuntos de interese social e ecolóxico como outros especificamente asociados ao eido da investigación matemática ou numérica.

Do punto de vista educativo, a publicación pretende introducir ao alumnado de secundaria e bacharelato na investigación formal. Deste xeito, o alumnado muda o rol pasivo que habitualmente ten asignado nas escolas por un papel máis activo na adquisición e formalización do coñecemento. Ademais de adquirir competencias específicas da área das matemáticas, esta experiencia pode ser motivadora en termos xerais, ben noutros eidos do coñecemento científico, ben tamén na investigación humanística.

O presente número consta de dúas seccións, Dentro do Marco e Fóra do Marco. Na primeira sección, Dentro do Marco, inclúense os artigos realizados polo propio alumnado do IES Marco do Camballón. Os traballos incluídos neste número son os seguintes:

- Lei de Benford xeralizada para números primos.

- O efecto invernadoiro no contexto da Unión Europea.

- Manchas solares: distribución e ciclos.

- O azar predicible: xerando números pseudoaleatorios.

- Análise estatística da distribución de sumas de Goldbach.

- Eficacia probabilística do test de primalidade de Fermat.

- Movemento browniano no contexto dunha apocalipse zombi.

- O método de Newton-Raphson no riff de Day Tripper.

- Autómatas celulares: un modelo para a propagación de enfermidades.

Na sección Fóra do Marco inclúense traballos de alumnado do IES Virxe do Mar (Noia) e IES Maruxa Mallo (Ordes):

- Planificación de rutas e teoría de grafos: un caso práctico.

- Programa de código aberto para a resolución de sistemas de ecuacións lineais.

- O consumo eléctrico e as súas tarifas.

- Os xuros e as mensualidades.

O presente número conta ademais cun limiar da profesora titular da Facultade de Matemáticas da USC Mª Victoria Otero Espinar.

Equipo de ciberasesor@s visita o colexio

No presente curso, o alumnado de 2º ESO traballou nun programa de mediación no entorno das redes sociais chamado Ciberasesor@s. Esta iniciativa xurdiu nas titorías de 2º ESO e inspírase en actuacións semellantes desenvoltas noutros centros. O obxectivo non é outro que o de concienciar ao alumnado dos riscos dun mal uso das redes sociais.

Durante as sesións de titoría de 2º ESO o alumnado traballou os distintos riscos asociados ás redes. A partir de aí, elaborou unha presentación centrada en dous temas: sexting e grooming. O noso alumnado asumiu un papel activo na medida en que as presentacións estaban destinadas ao alumnado de primaria do colexio da localidade, o CEIP Nosa Señora da Piedade. Con iso tratouse de conseguir que o noso alumnado se metera de cheo na materia a tratar e se responsabilizara da súa comunicación aos máis pequenos, de xeito que adquiriran unha maior implicación.

Valoramos moi satisfactoriamente o resultado da intervencións do alumnado. Conseguiron transmitir a idea de que as redes sociais deben ser empregadas con cautela e que temos que levar conta das nosas accións porque as consecuencias son imprevisibles.

O equipo de mediación tamén exporá a presentación ao alumnado de 1º ESO do noso centro, nunha sesión programada para esta semana.

Viaxe de repentistas do Camballón a Cataluña

O alumnado dos institutos das Cruces e de Baio viaxaron a Barcelona para participar nunhas xornadas de improvisación oral en verso xunto a adolescentes de Euskal Herria e de Cataluña.

O ano pasado foi Cataluña quen se sumou á experiencia e alumnado de Barcelona achegarase a Compostela para participar na Regueifesta 2018 con bascos e alumnado galego das catro provincias.

O primeiro día chegamos ao Ateneu Popular de Nou Barris e alí coñecemos o alumnado do convivio. Algunhas das alumnas xa levan catro anos de aventura, para outros era a primeira vez, e as actividades de presentación foron dinámicas e divertidas, e comezamos a improvisar xa desde o primeiro momento!

Ás 19.00 o teatro do Ateneu encheuse e tivo lugar o primeiro espectáculo, onde as representantes galegas se presentaron cantando, e improvisaron a partir do primeiro verso "Non hai auga para todos" e, finalmente, construíron unha copla a partir dun tema dado: "Tes que comprar mazás... Cales comprarías, as que veñen de moi lonxe e explotan traballadoras e destrúen o medio ambiente, e son máis baratas, ou as que veñen de perto da túa casa e son máis caras?

Ao día seguinte visitamos o IES Ramón Berenguer de Santa Coloma, un centro con moita inmigración de todas as partes do mundo e onde o catalá é lingua de unión. E subimos ao poboado íbero que, polo Camiño das Bruxas, fica ao pé do centro escolar. Foi un paseo duro mais valeu moito a pena porque no alto, na hora de tempo libre, apareceu a música de forma espontánea e cantamos e danzamos cada quen na súa lingua. Un momento máxico! 

De volta no instituto, o noso alunado regueifou de forma brillante sobre uns obxectos que a persoa que presentaba colocou no palco. Unha proba moi divertida!

Á tarde, roteiro polo bairro de Gràcia! Fantástico! Estivemos no local dunha asociación viciñal e despois no Centre Tradicionarius, onde nos falaron sobre cultura participativa, asociacionismo e música tradicional. 

E á tardiña visitamos o instituto Montserrat, e coas famílias e o alumnado do centro cantamos improvisando sobre varios temas. O máis divertido: ter que construír unha copla con palabras en euskera e catalá.

O terceiro dia foi o día do Improversem, o grande Encontro de Improvisación escolar catalá. O tema sobre o que tocou improvisar, o feminismo. E cun pé forzado apareceron coplas da embaixada galega como estas: 

Acabar co patriarcado

iso está nas nosas listas

vouvos dicir unha cousa

que nós somos feministas

Sonvos unha muller brava

e veño desde Galicia

e como nos é debido

nós sómosvos feministas. 

Desde o 8 de marzo

demostrouse o que sabía

as mulleres saen á calle* (rúa)

e nós somos feministas

Viva a Regueifesta! Viva Improversem! Gora Euskal Herria, Visca Catalunya, Viva Galicia!

2019-05-10 Barcelona

1º festival de Artes escénicas e danza

Non é a primeira experiencia que temos dun festival no auditorio de Vila de Cruces. Ao longo de todos estes anos,  o departamento de Educación Física organizou moitos festivais nos cales contidos coma o teatro, a expresión corporal, coreografías de diversos tipos e  exhibicións varias tiñan cabida neses espectáculos.

A gran diferenza é que agora contamos cunha  materia optativa en 4º ESO. 

O musical xorde da necesidade de intentar englobar todos os contidos aprendidos, darlle forma a través dunha performance audio-visual e, ao mesmo tempo, de canalizar o que fomos traballando nun obxectivo concreto.

Presentaron un musical, UN MUNDO PERFECTO?, que supón unha crítica feroz en clave de comedia do mundo que nos toca vivir e que nos rodea.

Neste I Festival de Artes escénicas e danzas temos, contamos coa participación doutros centros que nos presentaron o que están a realizar, moitas grazas ao IES de Melide e ao IES Chamoso Lamas de O Carballiño pola súa participación.

Artes escénicas e danza

Visita de Silvia Cernadas

O pasado 29 de abril o alumnado de 1º de ESO asistíu a unha charla sobre o libro de María Vinyals. Un talento rebelde impartida por Silvia Cernadas, persoa que fixo a revisión histórica da publicación.
Descubrimos a figura apaixoante de María Vinyals escritora. articulista e pioneira do feminismo.

2019-04-29 María Vinyals