Traballando diversidades da man da "La Voz de Galicia"

 No contexto do proxecto da biblioteca deste trimestre baseado na diversidade, como elemento transversal, xunto co proxecto de Prensa-Escuela na materia de Lingua Castelá e Literatura, traballáronse as identidades en 2º de ESO.

Nun mundo globalizado onde onde informacións, relacións socioeconómicas, culturais ou o simple contacto espállase por todo o Planeta é preciso comprender a diversidade social, cultural, non só no noso país, senón tamén nas propias aulas, pois non son alleas á realidade cotidiana. 

O centro, con presenza de alumnado de diferentes países e culturas do mundo debe ser exemplo de convivencia e aceptación do outro, que vai na liña de competencias tan importantes como a Cidadá e a Cívica, propias do noso sistema educativo. 

Na aula de 2ºde ESO traballouse ca noticia da película baseada no tema das migracións e dos sentimentos de pertenza a un territorio, país ou cultura, como pretexto para atopar nesta noticia os elementos básicos da comunicación, como son o emisor, receptor, mensaxe, código, canle e o contexto.

A Idade Media sae no Xornal

 Na clase de Relixión quixemos demostrar que a historia non está só nos libros. Para iso, achegámonos á prensa diaria na procura de novas, referencias e elementos que nos permitisen viaxar ata a Idade Media e, especialmente, ao mundo do Románico.

Unha igrexa, unha peregrinación, unha obra de arte, unha restauración ou unha celebración poden ser a porta de entrada para descubrir que o pasado segue moi presente no noso día a día.

Así, entre páxinas e titulares, o alumnado aprendeu a mirar o xornal con outros ollos e a descubrir que a historia tamén se agocha nas noticias de hoxe.

Sorpresas no Certamen Carlos Asorey

A II edición do Certame de Curtas Documentais Carlos Asorey, organizado pola Fundación Paco Lareo-A Solaina, foi toda unha sorpresa e unha experiencia moi enriquecedora.

Foi un pracer formar parte do xurado e achegarnos a tres propostas documentais: Penagache,

de Marcos Seijo; Casarocos, de Alicia López; e A senda da Deshabitaxe, de Candela Conde.

A xornada  de hoxe contou tamén cun emotivo saúdo de Alfonso Pato, director do Festival de Cans, que puxo un toque especial a este encontro arredor do cinema e da cultura galega.

Unha experiencia para lembrar, compartir e seguir celebrando o talento e as historias que nacen da nosa terra.

Grazas á Fundación Paco Lareo-A Solaina por facelo posible!

Delia, memoria viva do Camballón

                                                                   Querida Delia:

Hai persoas que forman parte da historia dun lugar, e ti es, sen dúbida, unha delas.

Viches medrar o Camballón desde aqueles primeiros pasos ata o que é hoxe. Viviches a súa evolución, os seus cambios, os seus retos e as súas alegrías. E fíxoo tamén grazas a ti, ao teu traballo, á túa dedicación e a esa presenza constante que, moitas veces sen facer ruído, resulta imprescindible para que todo funcione.

Desde o teu posto de administrativa, fuches moito máis ca unha profesional: fuches memoria, compromiso, apoio e compañeira de tantas persoas que compartiron contigo este camiño.

Ti es, dalgún xeito, como a biblioteca do centro: un lugar onde se garda a memoria, onde cada páxina conta unha historia e onde sempre hai algo que descubrir. Coñeces tantos capítulos da vida do Camballón, tantos momentos, tantas persoas e tantas vivencias, que eres parte dese libro colectivo que fomos escribindo entre todos ao longo dos anos. Un libro que tamén leva a túa letra, a túa pegada e o teu corazón.

Porque detrás de cada etapa, de cada logro e de cada pequeno paso adiante, hai persoas que deixan pegada, e ti deixaches unha moi especial no corazón do Camballón.

Hoxe comezas unha nova etapa, e aínda que os cambios sempre teñen algo de nostalxia, tamén traen consigo novas ilusións, tempo para ti e oportunidades para seguir escribindo fermosas páxinas na túa vida.

Queda atrás unha longa historia compartida, chea de momentos, experiencias e recordos que sempre formarán parte de ti e de nós. Pero, sobre todo, queda a gratitude por todo o que achegaches e polo privilexio de ter contado contigo durante tantos anos.

Grazas, Delia, por medrar co Camballón, por axudar a construílo día a día e por ser unha desas persoas que fan que un centro sexa moito máis ca un lugar de traballo: que sexa un lugar con memoria, con vida e con corazón.

Desexámosche que esta nova etapa veña chea de saúde, tranquilidade, alegría e momentos bonitos. Que a vida che devolva, en forma de felicidade, unha pequena parte de todo o que ti fuches dando aos demais.

O Camballón seguirá medrando e escribindo novas páxinas, pero sempre haberá un capítulo especial reservado para ti. Porque as persoas que forman parte da historia dun lugar nunca desaparecen dela.

Grazas por todo, Delia. Esta non é só unha despedida, é unha homenaxe a unha traxectoria, a unha compañeira e a unha persoa que merece todo o noso cariño e recoñecemento.

Que esta nova páxina da túa vida sexa unha das máis fermosas de ler.

Unha aperta enorme e os mellores desexos para todo o que está por vir.

O noso propio noticieiro

 O alumnado de 2º de Bacharelato de Relixión achegouse esta semana á actualidade dun xeito diferente: analizando o xornal e creando o seu propio noticieiro.

Despois de revisar diferentes novas, cada alumno e alumna escolleu aquelas que máis lle impactaron ou lle fixeron reflexionar. A partir delas, prepararon as súas intervencións para explicar non só que acontecera, senón tamén por que esa noticia lles chamara especialmente a atención.

Unha actividade para traballar a actualidade, a capacidade de análise e o pensamento crítico, pero tamén para descubrir que cada mirada sobre o mundo é única e ten algo que achegar.
Agora só queda darlle ao play e escoitar o que teñen que contarnos!

 

 

 

Prensa-Escuela na aula de Lingua Castelá

O alumnado de 2º de ESO puxo en práctica o proxecto Prensa-Escuela na materia de Lingua Castelá a través de dúas novas de actualidade.

Nunha delas, sobre obesidade infantil, traballaron na identificación de pronomes persoais tónicos e átonos. Noutra, dedicada ás treboadas, buscaron e clasificaron os conectores discursivos.

Deste xeito, a prensa convértese nun recurso para aprender lingua a partir de textos reais, achegando a aula á actualidade e facendo que a aprendizaxe sexa máis significativa.