Decribindo a arte. Un museo na aula

 Actividade de achegamento a arte plástica, a través do coñecemento de pintoras e pintores galegos, a súa vida e a súa obra artística, fixándonos nos que se centraron no retrato para, simultaneamente, traballar a descrición.

O club de lectura en Varilongo

O alumnado do club de lectura, dende 1º de ESO a 2º Bacharelato, viviu onte unha experiencia moi especial cunha saída a Santa Comba, onde tiveron a oportunidade de achegarse a un dos escenarios literarios que marcaron as súas lecturas deste curso: as minas de Varilongo, espazo no que se desenvolve a novela A casa da mina, de María Carmen Caramés Gorgal.

Esta visita permitiu conectar a literatura coa realidade, transformando as páxinas do libro nunha vivencia directa e significativa. Durante a xornada, o noso alumnado estivo acompañado polo alumnado do IES Terra de Xallas, compartindo así unha experiencia enriquecedora de convivencia e aprendizaxe.

Un dos momentos máis valiosos da visita foi, sen dúbida, o encontro con dúas mulleres que coñecen de primeira man a historia da mina: dona María Mourelle e dona María López. Ambas lembraron como, sendo moi novas, participaron nos duros traballos mineiros, ofrecendo ao alumnado un testemuño vivo cheo de memoria, emoción e verdade.

Da súa man, percorremos un tramo das antigas minas de Varilongo, descubrindo non só o espazo físico, senón tamén as historias humanas que nel quedaron gravadas. As súas palabras axudaron a comprender mellor a dureza das condicións laborais, así como a importancia social e económica que a mina tivo na zona.

Tras esta intensa visita, o grupo desprazouse ata O Ézaro, onde compartiron o xantar nun ambiente distendido e de convivencia. Alí tamén houbo tempo para a creatividade e a tradición oral, cunha divertida sesión de regueifa guiada por Jéssica Nantón, que puxo o broche lúdico a unha xornada xa de por si inesquecible.

Cómpre salientar, ademais, o vínculo histórico que une Santa Comba e Vila de Cruces, xa que ambos territorios comparten a explotación das minas de wolframio nunha época especialmente dura, como foi a Guerra Civil e a posguerra. Este contexto engadiu aínda máis significado á visita, permitindo ao alumnado comprender mellor o pano de fondo histórico da obra lida.

E esta experiencia non remata aquí: convidámosvos a que o vindeiro 4 de maio nos acompañedes a percorrer Santiago de Fontao, un lugar cheo de historia e memoria. Un pobo pequeno na súa orixe, pero que chegou a acoller a milleiros de persoas que viñeron traballar nas minas e que garda, aínda hoxe,
moitos recordos por descubrir e compartir.

Sen dúbida, unha experiencia completa que uniu literatura, historia, memoria e convivencia, e que o alumnado levará consigo moito máis alá das aulas.

Inglés no ciclo de TAPSD

 Our talented students from the APSD grade talk about their studies, future jobs and hopes.

Día da arte

Rematamos este trimestre celebrando o día da arte. O alumnado de 1º, 2º, 3º e 4º da ESO deixou voar a súa imaxinación buscando motivos decorativos para as súas creacións. Decoraron camisetas, bolsas e paraugas na biblioteca e na sala do alumnado. As súas obras serán expostas nos corredores do centro durante o terceiro trimestre e utlizadas para recaudar fondos para a Fundación Martín Álvarez Muelas, que investiga sobre cáncer infantil.

 

Apadriñamento lector

 O alumnado de 1º da ESO empezou a preparar os apadriñamentos lectores que desenvolvereomos durante o mes de abril.
Decoraron os marcapáxinas que imos levar como agasallo ao alumnado do Colexio Cerdeiriñas de Piloño e Nosa Señora da Piedade de Cruces.

Contaron coa axuda da nosa profe Maruja da Cunca que lles mostrou como elaborar o colgante de fío que levan de adorno.

Entrevista ao último mineiro de Fontao don Amable Brea

 FONTAO No marco do proxecto Donas de si, o alumnado de 2º de Bacharelato realizou unha investigación sobre a situación e o traballo da muller nas minas de wolframio de Fontao. Analizaron cuestións como o traballo na nima, os salarios o estraperlo, a situación dos presos políticos ou as actividades realizadas no tempo de lecer. A investigación completouse cunha entrevista realizada por Cristina Méndez a Amable Brea, o último mineiro que traballou en Fontao. Amable falou do seu traballo na mina, da situación da muller, que recibía un salario inferior ao dos homes e das actividades culturarais que se desnvolvían no poboado mineiro. Chegaron a existir catro cines e sesenta e catro tabernas. Tamén mencionou a Casa de Meléndez, onde se realizaban bailes con orquesta.

 Grazas a Paula Rivela descubrimos que esa casa sigue existindo. Queremos agradecer a colaboración de Amble Brea, do seu fillo Darío e a súa nora Celsa. E, especialmente, o traballo de Cristina Méndez que realizou a entrevista.

Día do cómic

Hoxe celebramos o día do cómic con algunhas das novidades que xa podedes levar en préstamo!

 

Concurso Rosalía de Castro

O venres entregamos o premio do concurso de ilustración sobre Rosalía de Castro. O gañador foi o alumno de 1º de ESO, Santiago Rivas Arriechi, que realizou un retrato de Rosalía en blanco e negro nun espazo aberto que destacou pola súa técnica e orixinalidade. 

Moitos parabéns polo teu traballo!

O alumnado leva a aula á radio

No noso centro o alumnado continúa demostrando que aprender pode ser tamén creativo, dinámico e moi motivador. Nas últimas semanas, os rapaces e rapazas están a traballar contidos de diversas materias a través da radio escolar, elaborando programas e podcast sobre temas moi variados relacionados co que estudan na aula.

Esta experiencia permítelles investigar, seleccionar información relevante e transformala nun formato atractivo para quen escoita. Deste xeito, os contidos de diferentes áreas convértense en programas interesantes nos que o alumnado explica, debate e comparte o aprendido.

Ademais, a radio convértese nun espazo perfecto para desenvolver habilidades moi importantes: a capacidade de traballar en equipo, organizar tarefas, respectar as opinións dos compañeiros e expresarse con claridade diante dun micrófono. Cada programa é o resultado dun proceso colaborativo no que todos e todas achegan algo: desde a preparación do guión ata a gravación final.

Os podcast que están a crear demostran non só o que saben, senón tamén a súa creatividade, responsabilidade e entusiasmo por comunicar. Sen dúbida, a radio escolar está a converterse nunha ferramenta educativa moi valiosa, na que aprender e comunicar van da man.

Iniciación segura á pegada dixital

O alumnado de 2º da ESO participa no programa "Iniciación segura á pegada dixital", onde persoal especialista de Amtega promove o uso seguro e responsabel de internet e redes sociais.

Todos e todas somos diferentes

 No marco das actividades de titoría, no centro estamos a traballar a diversidade como un valor fundamental para a convivencia. A través de diferentes dinámicas e reflexións na aula, o alumnado está a afondar na importancia de respectar, comprender e valorar as diferenzas que existen entre as persoas.

Como parte deste proceso, o alumnado participará na decoración dos corredores do centro, creando murais, mensaxes e elementos visuais que representen a riqueza da diversidade en todas as súas formas. Esta actividade permitirá que as ideas traballadas nas sesións de titoría se fagan visibles nos espazos comúns do colexio.

O principal obxectivo desta iniciativa é sensibilizar e visibilizar a diversidade, fomentando unha actitude de respecto, empatía e inclusión entre toda a comunidade educativa. Deste xeito, o centro convértese tamén nun espazo que transmite valores e que lembra cada día a importancia de convivir nun ambiente onde todas as persoas teñen cabida.

Visita ao CRE da ONCE

Visita ao CRE da ONCE en Pontevedra. O pasado xoves as alumnas de 1º e 2º de APSD visitaron o Centro de Recursos Educativos da ONCE en Pontevedra onde puideron observar e vivenciar os recursos existentes para persoas cegas, aprender a escibir en braille e as pautas básicas de como facer de guía dunha persoa cega. Unha visita moi entretida e produtiva.

 

Arrancan as xornadas Plambe!

Temos o pracer de participar como ponentes nestas xornadas dedicadas á dinamización das bibliotecas escolares e ao fomento da lectura nos centros educativos. Será un espazo de encontro, intercambio de experiencias e aprendizaxe compartida arredor do papel fundamental das bibliotecas na vida escolar.

Estamos moi ilusionados de poder compartir o noso traballo e coñecer tamén as iniciativas doutros centros que, como nós, apostan por facer da biblioteca un motor de innovación e participación na comunidade educativa.

Comezamos!

Xornada Plambe

Hoxe a nosa coordinadora da biblioteca, Susana Porral, participa nas Xornadas PLAMBE, un encontro no que centros educativos de toda Galicia comparten experiencias arredor das bibliotecas escolares.

Nesta ocasión, Susana presenta o funcionamento da biblioteca dun IES do rural, explicando como se organiza o traballo diario, que tipo de actividades se desenvolven ao longo do curso e como a biblioteca se converte nun espazo vivo de aprendizaxe, encontro e participación.

Durante a súa intervención falará tamén da importancia da coordinación coa comunidade educativa —profesorado, alumnado e familias— para facer da biblioteca un proxecto compartido que vai moito máis alá do préstamo de libros.

No noso centro, a biblioteca é un verdadeiro motor das actividades educativas e culturais, impulsando proxectos de lectura, investigación, creación e colaboración entre diferentes materias e iniciativas do centro.

Participar nestas xornadas é unha oportunidade para compartir o traballo realizado, aprender doutras experiencias e seguir facendo medrar a nosa biblioteca escolar como espazo clave para a educación.

 

Recordando ás vítimas de Gaza

Dende o inicio da guerra en Gaza en outubro de 2023, perderon a vida máis de 70.000 gazatíes, dos cales 20.000 eran menores de idade.

Sensibilizados coa barbarie que supón a guerra, sumámonos á iniciativa do IES Pintor Colmeiro (Silleda) e colaboramos con este centro no recordatorio das nenas e nenos tristemente falecidos a consecuencia do xenocidio na franxa de Gaza.

Rendemos así homenaxe ás vítimas menores, cuxos nomes figurarán nun espazo público da capital silledense tratando de que a súa vida non quede no esquecemento e lembrando a importancia dun mundo en paz. 

Nada se tira: do caldo ás croquetas

 Despois de desfrutar dun bo Caldo de Gloria, quedou carne sobrante. Maruja da Cuncha, a nosa experta en cociña, lembrou algo moi importante: na cociña, nada se tira, todo se pode aproveitar.

Grazas á súa sabedoría e ao seu amor pola cociña tradicional, ensinounos como reutilizar esa carne para preparar unhas ricas croquetas de polo. Axudou ao alumnado de TAPSD a poñer en práctica unha receita sinxela, saborosa e chea de sentido, demostrando que o aproveitamento tamén é unha forma de coidar o noso entorno e as nosas tradicións.

Aquí vos deixamos a receita que ela lles compartiu....

Unha vez preparada a masa, toca deixar repousar un día e logo hai que darlle forma, pasala por ovo e pan relado e fritir. 

… mirade que pintaza tiñan!

Moitas grazas, Maruja, por compartir connosco tanta sabedoría culinaria e por manter vivas as receitas tradicionais que pasan de xeración en xeración

Visita ao Centro para a Promoción da Autonomía Persoal

 

As alumnas do ciclo de Atención a Persoas en Situación de Dependencia visitaron o Centro para a Promoción da Autonomía Persoal en Bergondo, dependente do Imserso, e que é referente na atención integral de persoas con discapacidade. Puidemos ver as súas instalacións e aprender da súa labor.

Un recreo con sabor a caldo de Gloria

 Hoxe degustamos o caldo de gloria elaborado onte por Maruja da Cunca.

Na entrada do centro toda a comunidades educativa compartiu este humilde pero delicioso prato para celebrar o Día de Rosalía e tamén, a nosa cultura gastronómica e popular. 

Aproveitamos para ler o poema Miña casiña meu lar do libro Follas Novas, escrito nos manteis facilitados pola fundación Rosalía De Castro, á que agradecemos o impulso deste tipo de iniciativas. 

Hoxe facemos caldo de Gloria: tradición que se comparte grazas a Maruja da Cunca

Hoxe o centro énchese de arrecendo coa pota ao lume e de memoria compartida. Maruja da Cunca vai elaborar un caldo de Gloria, unha iniciativa inspirada no poema “Miña casiña, meu lar” de Rosalía de
Castro, no que se explica como facer un caldo humilde mentres se relata a épica diaria da supervivencia, da dignidade e da vida sostida co pouco.

Esta actividade coincide coa data do nacemento da autora, o 23 de febreiro de 1837, en Santiago de Compostela. Ao día seguinte foi bautizada na igrexa do Hospital Real, tal e como consta no rexistro parroquial.

O caldo galego típico, en enxebre, o de verdade, redúcese sinxelamente a unha mestura de patacas, feixóns, verduras e unto de porco, rancio, e máis nada.

Maruja estará acompañada polas alumnas do ciclo medio de TAPSD, que participarán activamente na elaboración da receita, convertendo a cociña nun espazo de aprendizaxe, transmisión oral e coidado compartido. O caldo resultante degustarase no recreo, nun momento para parar, xuntarnos e recoñecer o valor do esencial.

A receita do caldo de Gloria.

Nun pote grande póñense feixóns e auga case ata enchelo. Ponse o pote ao lume e, cando ferve, bótaselle o unto en proporción, non ao que o caldo require, senón ao que o peto do comensal permite.

Á hora e media de estar cocendo, bótanselle as patacas finamente cortadas e, cando están cocidas, engádense as verduras lavadas, cortadas e escollidas, facendo ferver de novo a mestura destapada.

As verduras poden ser nabos, nabizas, grelos, col ou unha verza moi típica que entre nós é coñecida co nome de verdura galega.

Innecesario é dicir que isto ten que levar o sal correspondente.

Hai quen espesa este caldo desfacendo, cando están ben cocidas, algunhas patacas, algunhas fabas e mailo unto.

Un caldo humilde, si, pero cheo de historia, identidade e calor humano.

Visita a Innovart26

 

O alumnado de FP e de 4°ESO visitou Innovart26 na Cidade da Cultura para coñecer as ensinanzas de FP de réxime especial que se ofertan en Galícia. 

Nesta visita o alumnado tivo ocasión de participar en diversos obradoiros tales como restauración de obras de arte, creación de colgantes con arxila, escritura en chino ou campeonato de fútbol entre outras.