Blog da Biblioteca escolar do IES "Marco do Camballón"
Alba e Nemo, dous adolescentes, son o fío condutor desta Historia da Filosofía para mozas de Fernando Savater. Enlazando maxistralmente as vidas dos máis importantes filósofos, fainos partícipes das correntes de pensamento que marcaron a historia da humanidade desde Sócrates até o século XX. O prólogo introduce aos mozos na idea de que é a filosofía para inmediatamente arrincar, da man de Alba e Nemo e as súas particulares reflexións, coas súas orixes, logrando un texto excepcional que sen dúbida interesará a todo tipo de público.
A reflexión sobre situacións cotiás que afectan o individuo común, tales como acudir ao traballo, ir ao médico, reunirse coa familia e os amigos ou gozar dos momentos de lecer, constitúe o punto de partida para analizar diversos conceptos que o autor extrae do mundo da arte, a filosofía, a literatura, a política ou a psicoloxía. O libro constitúe unha orixinal síntese da historia das ideas; un percorrido a través dalgunhas das grandes liñas da cultura universal. Unha análise intelixente que facilita a comprensión de formulacións teóricas básicas do pensamento universal.
Onfray é o académico que sae á rúa para dicirlle ao mundo: a historia do pensamento que vos contaron é só a máis conveniente á serenidade dos poderosos. Ao idealismo de Platón, dos Pais da Igrexa e de Kant oponse outra liña que non ve o corpo e o pracer como un obstáculo para o coñecemento, senón todo o contrario. No primeiro capítulo, o filósofo preséntase en carne viva: «Falecín á idade de dez anos...» É o momento en que ingresa no orfanato. Os tormentos daqueles anos mostran como o corpo do filósofo é a matriz e a materia de que están feitas as ideas. Nietzsche é a figura tutelar desta contrafilosofía, pero tamén Montaigne, Pascal, e mesmo Descartes. Nas dúas palabras que integran o subtítulo desta obra, Manifesto hedonista, está o programa do labor que Onfray vén realizando. «Manifesto» pola súa potencia política e «hedonista» pola súa reivindicación do potencial liberador do pracer e da necesidade de romper coa tradición que nos fixo crer que o mundo material non cabe no ceo das ideas. 
