Visita do alumnado de 6º Primaria

 Hoxe tivemos unha visita moi especial, o alumnado do CEIP PlurilingúevCerdeiriñas de Piloño e do CEIP A Nosa Señora da Piedade veu coñecer o noso centro. 

Xairo, Sarai e África, voluntarios da biblioteca, mostráronlles os distintos espazos do centro e realizaron con eles un xogo de pistas. Faláronlles dos clubs de lectura, a radio, o voluntariado e outras actividades que realizamos durante este curso. 

Benvidos/as, esperamos que visitedes moito a biblioteca durante o próximo curso!

Compartindo contos, creando ilusións. Apadriñamento lector

 

O alumnado de 1º de ESO da materia de Relixión visitou hoxe ao alumnado de infantil do colexio A Nosa Señora da Piedade para compartir unha fermosa xornada de lectura.

Durante a mañá, pequenos e maiores gozaron de contos, xogos e momentos de convivencia que encheron o parque de ilusión e sorrisos. Esta actividade permitiu non só fomentar o gusto pola lectura, senón tamén fortalecer valores como a empatía, o coidado dos demais e a colaboración.

Queremos agradecer ás profes de infantil a súa acollida e o seu excelente traballo, que fixeron desta experiencia un recordo moi especial para todo o alumnado

IX Encontro de entroido

 

O podcast que acabamos de publicar é só un pequeno adianto de todo o que está por vir. Un aperitivo sonoro que nos abre a porta ao Encontro de Entroido, unha cita moi especial que reunirá á comunidade educativa de Vila de Cruces nun día cheo de creatividade, convivencia e celebración compartida.

Animámosvos a escoitalo e, sobre todo, a achegarvos ao Auditorio Xosé Casal a partir das 11 aproximadamente, onde terá lugar o encontro intercentros no que participarán o CEIP Plurilingüe de Cerdeiriñas, o CEIP Plurilingüe Nosa Señora da Piedade e o IES Marco do Camballón. O que se escoita no podcast é só unha mostra do talento, da ilusión e do traballo colaborativo que se poderá vivir en directo.

Dádelle ao play, deixádevos contagiar polo ambiente… e preparádevos para gozar dun Entroido que promete ser inesquecible.

Visita ao colexio

Hoxe o alumnado de 1º e 2º de ESO do Club da lingua e Club de Regueifa foi impartir un obradoiro de regueifa  para 5º e 6º de primaria. 

Fixeron un certame de Regueifa para todo o alumnado do centro e  profesorado. Que ben o pasaron!!

Este luns 22 de decembro Regueifa Tour ás 18.30 no Auditorio.

Viva a regueifa!!

 

Apadriñamento lector no CEIP Nosa Señora da Piedade

 

No día de onte, o noso alumnado de 1º ESO de Relixión apadriñou ao alumnado de Educación Infantil no CEIP Nosa Señora da Piedade. 

Cada padriño ou madriña foi buscar aos seus afillados e afilladas lectores ao cole e despois, buscaron un lugar no parque da Residencia para ler o libro. Aparte da lectura, compartiron charlas e xogos  nas instalacións do propio parque.

O alumnado do Camballón foi obsequiado cun marcapáxinas pintado polo alumnado de Infantil. Aquí podedes ver algúns deses marcapáxinas. Moitas grazas!!

Preparando o apadriñamento lector

 O alumnado de 1º de ESO de Relixión comezou este mes de abril a preparar o apadriñamento lector do alumnado  de Educación Infantil do CEIP Cerdeiriñas de Piloño e CEIP Nosa Señora da Piedade. Aquí tedes unha mostra do que están a facer.

Visita do alumnado de 6º de Primaria

Hoxe foi un día moi especial, pois recibimos a visita do alumnado de 6º de Primaria do CEIP Nosa Sra. da Piedade e CEIP de Piloño, que para o próximo curso realizarán 1º da ESO no noso instituto.

Na acollida participou o alumnado voluntario da biblioteca, que recibiron aos seus futurxs compañeirxs, percorreron con elxs as instalacións e realizaron un xogo de descuberta fotográfica en equipos co que puideron coñecer todos os recunchos do instituto. O alumnado voluntario tamén intercambiou experiencias co alumnado visitante e contáronlle unha morea de cousas sobre o instituto (como se organiza a biblioteca, actividades que se levan a cabo no centro, os recreos culturais, que se fai nas titorías, importancia de cumprir as normas...). Logo, tras coñecer algunhas cuestións sobre a nova etapa, desfrutamos todxs xuntxs dunha merenda na cafetería e tamén houbo tempo para o esparcemento. Sen dúbida, foi unha estupenda xornada de convivencia coa que esperamos facilitar o tránsito á secundaria do futuro alumnado.

Por suposto, temos que agradecer ao alumnado voluntario da biblicoteca (Shaila, África, Emily, Dayna, Aldara, Candela e Maxi), que fixeron un gran traballo colaborando coa biblioteca e o departamento de orientación no desenvolvemento da actividade. Foron uns grandes anfitrións e lograron que o futuro alumnado se sentira moi cómodo e integrado!

Apadriñamento lector no Cole

O alumnado de 1º ESO de Relixión fixeron o apadriñamento e amadriñamento lector do alumnado de infantil do CEIP Nosa Señora da Piedade.Para a actividade empregamos contos da biblioteca do seu colexio. Fixemos unha saída ao parque e alí realizamos a actividade, onde se leron contos, xogaron e os padriños lectores os agasallaronos cun marcapáxinas.

Grazas CEIP Nosa Señora da Piedade por esta experiencia!!

Entroido intercentros

 

Hoxe tivo lugar o encontro de entroido intercentros, onde houbo Xenerais do Ulla dos colexios de Piloño e das Cruces e Regueifeiras do IES Marco do Camballón.

Viva o entroido!!

Apadriñamento e amadriñamento lector en Nosa Señora da Piedade

 

Hoxe fixemos o apadriñamento e amadriñamento lector co alumnado do CEIP Nosa Señora da Piedade de Vila de Cruces. O alumnado de 1º de ESO de ITI, leron 4 libros ao alumnado de Infantil.

Apadriñamento lector ao alumnado de 4º de Infantil

 Os alumnos e alumnas do CEIP Nosa Señora da Piedade foron hoxe apadriñados por un grupo de alumnos e alumnas do IES.

Apadriñamento lector ao alumnado de 5ºB de Educación Infantil

De novo voltamos cos apadriñamentos lectores para o alumnado de 5º B de Educación Infantil do CEIP Nosa Señora da Piedade.