Viaxamos á estratosfera na MarumaSat VII

Onte o alumnado de 1º BAC participou no lanzamento da MarumaSat VII. A cápsula subiu á estratosfera até acadar os 35128 m, para aterrar posteriormente ao sur de Lalín. O grupo de rescate conseguiu localizala preto das 17 h. Nunha primeira inspección, todos os dispositivos e experimentos chegaron en perfecto estado, así que agora toca analizar datos e sacar as conclusións correspondentes. 

O alumnado do noso centro asumiu varias tarefas importantes. A primeira delas ten que ver co seu experimento científico, cuxo obxectivo é obter a través da trigonometría unha aproximación do radio terrestre a partir das imaxes tomadas pola cámara de a bordo. 

Por outra banda, durante o lanzamento o alumnado dividiuse en dous grupos: un encargado do inflado de globo e atado do paracaídas e a cápsula; e o outro á fronte da emisión en directo do lanzamento na canle de youtube da NOSA. Axencia Espacial Escolar Galega. Un equipo de tres alumnas tamén participou na misión de rescate da cápsula que se organizou tras o despegue e que se desprazou até Lalín. 

O profesorado do proxecto quere recoñecer o compromiso e enerxía do alumnado de 1º BAC, así como a solvencia coa que souberon resolver todo o proceso. Tamén valora a súa actitude responsábel e agradece enormemente a boa disposición coa que asumiron o reto.

Participamos no congreso da NOSA

 

O alumnado de 1o BAC asistiu ao congreso anual da NOSA celebrado o 25 de febreiro, organizado en

Cerceda.

A NOSA. Axencia Espacial Escolar Galega é un proxecto colaborativo promovido por varios centros

públicos galegos co obxectivo de lanzar unha cápsula estratosférica con distintos experimentos científicos.

O noso alumnado presentou os obxectivos do seu experimento: a estimación do radio terrestre a través de

datos de imaxe. No punto álxido do voo, cando a cápsula supere os 30 km de altitude, rexistraranse

imaxes da superficie terrestre a partir das cales o alumnado obterá unha aproximación do radio da Terra

empregando os seus coñecementos de trigonometría.

O lanzamento está previsto para o mes de maio.

Participamos no último lanzamento da NOSA

 Este mércores 22 de maio, o alumnado de 4º ESO do IES Marco do Camballón participou no lanzamento da cápsula estratosférica MarumaSat VI, que tivo lugar na Cidade da Cultura de Santiago de Compostela ás 13 h. A actividade está organizada pola NOSA. Axencia Espacial Escolar Galega, da que forman parte outros cinco centros públicos do país canda o noso: CPI O Cruce (Cerceda), IES Miraflores (Oleiros), IES Xelmírez II (Santiago de Compostela), IES Ramón Caamaño (Muxía) e CEE de Panxón (Nigrán).

A cápsula montaba os experimentos da chamada Misión asubIA, en referencia ás potencialidades da intelixencia artificial que se incorporaron. Son os seguintes:

- Un levitador para medir as variacións de velocidade de transmisión do son en altitude. Este experimento foi proposto pola intelixencia artificial, en concreto pola ferramenta coñecida como ChatGPT.

- Dous experimentos biolóxicos, unha mostra de ADN e outra dun fungo liofilizado para estudar como lles afectan condicións atmosféricas extremas. 

- Unha placa peltier que transforma as baixas temperaturas exteriores en voltaxe, de xeito que nun lanzamento futuro poida ser empregalo como fonte de alimentación doutros dispositivos internos.

- Un localizador LoRa, deseñado por alumnado, para rexistrar coordenadas de posición.

- Unha radiosonda para medición de variábeis atmosféricas, que servirán para unha análise numérica e tamén para a elaboración da harmonía musical do ascenso co emprego da ferramentas de intelixencia artificial.

O lanzamento foi un éxito, se ben non estivo exento de dificultades. A cápsula vai impulsada por un globo meteorolóxico inflado con helio, e este ano tivemos que xestionar unha importante dificultade nese aspecto. O primeiro globo rispóusenos nos intres previos á conta atrás. Nun traballo de equipo excepcional, o alumnado soubo refacerse e en cuestión de minutos preparamos un segundo globo e estabamos listos para o lanzamento. Todo saíu ben desta vez e puidemos entrar na segunda fase, que

é o rescate da cápsula no punto de aterraxe.

O grupo de seguemento e rescate do noso centro estivo formado por Daniela del Río, Nerea Canda, Victoria Méndez, Xiana Rey e Xiana Taboada. Coas coordenadas da aterraxe, o noso equipo foi o primeiro en chegar ás inmediacións, nun punto da montaña raiano con Castela. Tras un breve rastrexo da contorna, atopamos a cápsula en boas condicións tras o impacto. O seguinte paso será a análise dos datos rexistrados de cara ao seguinte congreso. 

Outros dos fitos deste ano foi que, por segundo ano consecutivo, un equipo do noso centro retransmitiu o lanzamento en directo a través da canle de Youtube da NOSA, coa novidade de empregarmos medios profesionais xestionados polo alumnado (rexidor: Unai Ayude; cámara: Xiana Sánchez; presentadores: Pablo Núñez e Xoán Vila; director: Xabier Ferro).

O profesorado da NOSA quere felicitar e agradecer o magnífico traballo e compromiso do alumnado do centro en todas as responsabilidades do proxecto nas que se involucrou. Neste punto, non podemos esquecer o difícil comentido do equipo de atado e inflado que, malia o momento de tensión vivido, soubo resolvelo de xeito óptimo, con cabeza e tempero. Parabéns a todas e todos!

Participamos no lanzamento da cápsula estratosférica MarumaSat V

 

O IES Marco do Camballón participou no operativo de lanzamento da cápsula estratosférica MarumaSat V, organizado pola NOSA. Axencia Espacial Escolar Galega. O despegue tivo lugar o 10 de maio ás 12 h desde a Cidade da Cultura de Santiago de Compostela. 

NOSA. Axencia Espacial Escolar Galega é un proxecto educativo que envolve a varios centros de secundaria e bacharelato galegos e leva en marcha desde o curso 2014-15. Os centros que forman parte da NOSA son o IES Miraflores (de Oleiros),  IES Marco do Camballón (de Vila de Cruces), IES Arzobispo Xelmirez II (de Santiago de Compostela) e o CPI O Cruce (de Cerceda). A este lanzamento precedérono outros catro, os das MarumaSat I á IV, todos eles con resultados moi exitosos: interesantes experimentos a bordo, impresionantes imaxes da curvatura terrestre gravadas polas cámaras que viaxan na cápsula, novas cotas de altura cada vez maiores…

Coa MarumaSat V retómanse os lanzamentos das cápsulas estratosféricas MarumaSat, que quedaron suspendidos desde o ano 2020 coa pandemia da COVID. Os obxectivos deste novo lanzamento quedaron definidos naquel ano 2020, nun congreso organizado en Santiago de Compostela ao que asistiu o alumnado dos centros participantes. 

Un dos obxectivos da MarumaSat V é a incorporación dunha cámara 360º que gravará neste formato as imaxes do ascenso e descenso. A cápsula tamén incorpora unha estrutura impresa

en 3D deseñada para portar un ovo, co propósito de que resista os abaneos da viaxe e o impacto da aterraxe e regrese intacto á superficie. Ademais diso, instalarase un dispositivo LoRa para estabelecer comunicación por radio coa cápsula. Tamén se rexistrarán diversas magnitudes atmosféricas así como o campo magnético terrestre en altura.

As previsións de traxectoria indicaban que a aterraxe tería lugar nun punto do concello de Quiroga, como efectivamente ocorreu. Tras o lanzamento, organizouse un equipo de rescate, con alumnado dos centros implicado,s que se desprazou até as coordenadas da aterraxe. A cápsula pousouse nas estribacións do Courel, nun punto de difícil acceso. Finalmente, a media tarde e con algo de esforzo, recuperamos a cápsula intacta con todos os experimentos a bordo.

O noso alumnado asumiu o proceso de inflado e atado do globo, paracaídas e cápsula. 

Ademais, encarágaronse da cobertura en directo do lanzamento desde a canle de Youtube da NOSA, emisión que se realiza este ano por primeira vez.

Queremos agradecer ao noso alumnado a súa implicación no proxecto, que favoreceu que todo se resolvera con éxito. A partir de agora, analizaremos os datos recollidos para elaborar os informes cientíticos que se exporán no seguinte congreso da NOSA.

IV Congreso NOSA

O noso alumnado participou no IV Congreso NOSA, celebrado  o 10 de febreiro en Santiago de Compostela. NOSA. Axencia Espacial Escolar Galega é un proxecto colaborativo do que forman parte media ducia de centros públicos galegos, e que se encadra no ámbito STEAM (Ciencias, Tecnoloxía, Artes e Matemáticas).
O congreso deste ano estivo organizado polo IES Xelmírez II e tivo lugar no Auditorio de Galicia. A conferencia inaugural sobre contaminación luminosa correu a cargo do físico da USC Salvador Bará. Contamos coa presenza da conselleira de Educación, Carmen Pomar, que se dirixiu aos asistentes antes de dar paso á mesa científico-tecnolóxica.
O noso instituto achegaba dous relatorios: Microorganismos extraterrestres, de Lucía Pampín e Iván Fernández, e que explicaba os resultados dos dous experimentos biolóxicos que viaxaron na MarumaSat IV; Intervalos preditivos na detección de muóns, de Laura Domínguez, Christian Souto, Vicky Rivas e Alba Lareo, que explicaba o procedemento de estimación de intervalos a un certo nivel de confianza a partir dos datos do detector de muóns instalado na cápsula.
A xornada completouse cun recital poético-musical sobre mulleres astrónomas  a cargo da poeta Estíbaliz Espinosa.

PARTICIPAMOS NO CUARTO LANZAMENTO DA NOSA

O pasado 28 de maio, o noso centro participou no lanzamento da cápsula estratosférica MarumaSat IV, organizado pola NOSA. Axencia Espacial Escolar Galega. Baixo o nome de "Misión Einstein: rastrexando raios cósmicos", esta cápsula pretendía poñer en marcha unha serie de experimentos moi interesantes: dúas mostras biolóxicas expostas á radiación e condicións da estratosfera, para analizar a influencia destes factores nelas; sensores de ozono e radiación UV; medición do campo magnético terrestre; e un detector de muóns que pretende evidenciar de xeito empírico algúns efectos pronosticados pola Teoría da Relatividade de Einstein.

O día do lanzamento, o tempo era favorábel ao voo, se ben en superficie había rachas de vento que provocaron o impacto da cápsula contra un muro aos poucos metros do despegue. Malia iso, a misión continuou sen máis contratempos, aterrando nas inmediacións do concello de Maceda. Tras catro días de búsqueda, a cápsula puido ser recuperada con éxito grazas á colaboración no rastrexo da familia Regos, de Ordes. Tras abrir a cápsula, puidemos comprobar o bo estado do instrumental e iniciar a análise dos datos.

Neste voo acadamos un novo rexistro de altura, chegando aos 35553 m. A anterior marca fixáraa a MarumaSat II, con 33612m

Salomé: III CONGRESO NOSA

O pasado 11 de febreiro, o IES Marco do Camballón participou no III Congreso NOSA, celebrado no Auditorio Gabriel García Márquez de Oleiros. Neste congreso presentáronse varias comunicacións que analizaban os datos do voo da cápsula MarumaSat III, lanzada o pasado mes de maio. 

Alén diso, o acto constituíu o primeiro encontro cos nosos centros incorporados ao proxecto. Neste momento, a NOSA está formada por seis centros públicos galegos: IES Maruxa Mallo, IES Miraflores, IES Xelmírez II, IES Ferrol Vello, CPI O Cruce e IES Marco do Camballón. 

Na xornada presentouse a páxina web da NOSA (www.nosa.gal) e contouse coa presenza da escritora e profesora Marilar Aleixandre, que ofreceu unha conferencia sobre pensamento crítico no eido das ciencias.

Proxecto Nosa

Onte, 7 de maio, lanzamos nas instalacións do IES Maruxa Mallo (Ordes) a cápsula estratosférica MarumaSat III, con varios experimentos científicos a bordo. A cápsula incluía sensores de ozono e radiación ultravioleta, sensores atmosféricos, unha placa solar en probas, unha incubadora para un ovo de abella obreira, unha cámara de vídeo e varios dispositivos de localización.

O lanzamento tivo lugar ás 12 h pero, fatalmente, deixamos de recibir información da súa posición cando a cápsula voaba a un 137000 m de altitude. Con todo, puidemos seguir o seu traxecto ata a Serra de Outes, onde estimamos que puido tocar terra.

Nestes momentos descoñecemos o seu emprazamento pero estamos facendo un chamamento a todas as persoas que a poidan ver para que avisen a algún dos tres centros participantes.

2018-05-07 Nosa

Proxecto NOSA, lanzamento

Despois de dous intentos para o lanzamentos hoxe tivo lugar o lanzamento da cápsula que forma parte do proxecto educativo dos centros de secundaria Maruja Mallo, Miraflores e Marco do Camballón. Dentro ía semillas de plantas, saliva dunha alumna e unha lombriz. O globo lanzouse de Ordes ás 12 e caeu en Puxallos (Lalín) ás 15:40.


2017-05-30 NOSA - Kizoa Editar Videos - Movie Maker

Nosa prepara o seu novo lanzamento ao espazo

O alumnado de 4º de ESO e 1º de bacharelato forma parte desde este curso do proxecto de creación da Axencia Escolar Espacial Galega, NOSA, xunto co do IES Maruxa Mallo de Ordes e mais o do IES Miraflores de Oleiros. Esta iniciativa do departamento de Matemáticas concretarase nun lanzamento dunha cápsula á estratosfera ( que contén unha sonda cunha cámara, un GPS e instrumentos de medición de fenómenos atmosféricos) o próximo venres, 5 de maio, co obxectivo de recadar datos científicos e de filmar imaxes do espazo. Pódese consultar máis información en:  Galicia confidencial, Praza pública, RTVG,Sermos Galiza.