Hoxe facemos caldo de Gloria: tradición que se comparte grazas a Maruja da Cunca

Hoxe o centro énchese de arrecendo coa pota ao lume e de memoria compartida. Maruja da Cunca vai elaborar un caldo de Gloria, unha iniciativa inspirada no poema “Miña casiña, meu lar” de Rosalía de
Castro, no que se explica como facer un caldo humilde mentres se relata a épica diaria da supervivencia, da dignidade e da vida sostida co pouco.

Esta actividade coincide coa data do nacemento da autora, o 23 de febreiro de 1837, en Santiago de Compostela. Ao día seguinte foi bautizada na igrexa do Hospital Real, tal e como consta no rexistro parroquial.

O caldo galego típico, en enxebre, o de verdade, redúcese sinxelamente a unha mestura de patacas, feixóns, verduras e unto de porco, rancio, e máis nada.

Maruja estará acompañada polas alumnas do ciclo medio de TAPSD, que participarán activamente na elaboración da receita, convertendo a cociña nun espazo de aprendizaxe, transmisión oral e coidado compartido. O caldo resultante degustarase no recreo, nun momento para parar, xuntarnos e recoñecer o valor do esencial.

A receita do caldo de Gloria.

Nun pote grande póñense feixóns e auga case ata enchelo. Ponse o pote ao lume e, cando ferve, bótaselle o unto en proporción, non ao que o caldo require, senón ao que o peto do comensal permite.

Á hora e media de estar cocendo, bótanselle as patacas finamente cortadas e, cando están cocidas, engádense as verduras lavadas, cortadas e escollidas, facendo ferver de novo a mestura destapada.

As verduras poden ser nabos, nabizas, grelos, col ou unha verza moi típica que entre nós é coñecida co nome de verdura galega.

Innecesario é dicir que isto ten que levar o sal correspondente.

Hai quen espesa este caldo desfacendo, cando están ben cocidas, algunhas patacas, algunhas fabas e mailo unto.

Un caldo humilde, si, pero cheo de historia, identidade e calor humano.

Visita a Innovart26

 

O alumnado de FP e de 4°ESO visitou Innovart26 na Cidade da Cultura para coñecer as ensinanzas de FP de réxime especial que se ofertan en Galícia. 

Nesta visita o alumnado tivo ocasión de participar en diversos obradoiros tales como restauración de obras de arte, creación de colgantes con arxila, escritura en chino ou campeonato de fútbol entre outras.

Caldo de Gloria: do pote á comunidade da man de Maruja da Cunca

Non esquezades traer o luns unha cunca e unha culler.

Imos degustar o Caldo de Gloria, inspirado no poema “Miña casiña, meu lar” de Rosalía de Castro.

Na cociña teremos unha mestra de excepción, Maruja da Cunca, acompañada dunhas pinches inmellorables: as alumnas do ciclo de TAPSD.

Vémonos no recreo no hall do centro, 1ª planta.

Haberá caldo… pero non calquera... o de Gloria.

Saúde mental

Contiuamos a falar de saúde mental co alumnado de 4º ESO e o CM de Atención a persoas en situación de 
dependencia.


Desta volta tocou o turno ás emocións: aprendemos a identificalas, recoñecelas e xestionalas, ao tempo que poñemos en práctica habilidades sociais.

Todo isto, de man da Asociación Fonte da Virxe.

Homenaxe a Rosalía de Castro

A palabra convértese en arte, e a arte en emoción. Con motivo da celebración da figura de Rosalía de Castro, convidámoste a participar nun concurso creativo onde poderás expresar, dende a túa propia mirada, o que esta autora significa para ti e para a nosa cultura.

Poderás empregar calquera técnica ou formato: debuxo, pintura, collage, fotografía, escultura… non hai límites cando a creatividade fala! O importante é que a túa obra sexa persoal, sentida e chea de intención.

Haberá 5 premios, e o xurado valorará especialmente:

a creatividade,

a orixinalidade,

a habilidade técnica,

                                                             e a composición da obra.

Este é o teu momento para crear, experimentar e deixar pegada. Atréveste a dialogar con Rosalía dende o século XXI?

Participa e fai que a súa voz siga viva a través da túa creación.

 

Un Entroido cheo de cor, música e diversión

 

Nas últimas horas da mañá tivo lugar o esperado Concurso de Entroido, unha xornada chea de alegría, creatividade e bo ambiente. O concurso contou con diferentes modalidades, nas que participaron persoas de maneira individual, en grupo e tamén na categoría de coreografía.

Na modalidade individual, o disfraz gañador foi María Antonieta, que destacou pola súa elegancia e coidado dos detalles. O premio ao mellor disfraz en grupo foi para a temática dos Xogos Olímpicos, cunha posta en escena moi orixinal, mentres que na categoría de coreografía triunfaron Alvin e as Ardillas, facendo gozar ao público coa súa enerxía e ritmo.

O equipo da biblioteca tamén se sumou á celebración cun fermoso disfraz inspirado en Frida Kahlo, enchendo o espazo de arte e cor. Ademais, houbo moitas persoas disfrazadas que, aínda que non participaron no concurso, contribuíron a crear un ambiente festivo e participativo.

A xornada foi realmente moi divertida, con risas, música e incluso photocall, onde se puideron inmortalizar os mellores momentos do día.

Parabéns ás persoas gañadoras e grazas a todas e todos por facer deste Entroido unha celebración inesquecible! 

Memorias dun neno labrego no teatro.

O alumnado de 1º ESO foron a  Compostela ao teatro ver "Memorias dun neno labrego", adaptación da novela do noso veciño Pepe Neira Vilas, que marabilla!

Ademais, as actrices e actores saudáronnos co saúdo regueifeiro ao final da obra! Viva vós!

Antes, fixeron unha actividade sociolingüística polas rúas, fomos á libraria Couceiro, entrevistamos a Mónica García, Federico Pérez e Santi Romay, do elenco da obra de teatro,  e visitaron o Panteón de Galegos Ilustres e o Museo do Pobo Galego.

Recomendamos de corazón esta obra de teatro. É brutal! 

A meca informa

 

Obradoiro: Primeiros auxilios

 O alumnado de 2º ESO, 3º ESO e formación profesional participa nun obradoiro de primeiros auxilios impartido por profesorado da Universidade da Coruña.

Aprenderon de forma práctica a actuar en casos de esvaecementos, a realizar a manobra de reanimación cardiopulmonar (RCP) e a empregar o desfibrilador.

Sen dúbida, unha lección moi útil que axuda a salvar vidas e agardamos que compartan cos máis achegados!

Nova encomenda da meca

 

A meca informa

 

A visita da meca

 

Vivas aos Xenerais: un Encontro de Entroido para lembrar

 O Encontro de Entroido foi, sen dúbida, un éxito rotundo. O alumnado non só gozou intensamente da xornada, senón que tamén deixou claro que o Entroido é unha tradición fondamente viva e sentida no noso concello. O que se viviu foi unha representación completa e chea de forza do noso Entroido, onde non faltou ningún dos seus elementos máis característicos.

O acto deu comezo co alto dos Xenerais, cargado de pillería, humor e cancións retranqueiras que arrincaron risas e aplausos do público. O centinela fixo o seu papel dando paso ao correo, ao que se lle preguntou que quería, para logo permitir o atranque, no que os Xenerais criticaron con ironía e intelixencia problemas políticos tanto de carácter nacional como internacional. Pero o Entroido tamén mira cara ao próximo, e esa función asumírona os Moros —personaxes disfrazados de vellada—, encargados de poñer o foco nas problemáticas da contorna máis cercana.

O alcalde tomou a palabra para contar os proxectos previstos para este ano, antes de pechar o acto co sermón do frade, que, fiel á tradición, aconsellou ás persoas oíntes sobre como deben actuar na súa vida diaria. 

Ao longo de todo o encontro non faltaron as regueifas nin as vivas dos Xenerais, enchendo o ambiente de entusiasmo, participación e identidade cultural compartida.

Este encontro demostrou, unha vez máis, que o Entroido segue moi presente nas novas xeracións. Para o ano que vén celebrarase unha nova edición, coa ilusión de seguir mantendo viva esta tradición. Grazas aos centros educativos por facer posible que isto continúe.

Gañadores premios Ilustracións

 O concurso artístico deste ano contou cunha alta participación, mostra do interese, da creatividade e do talento que hai na nosa comunidade educativa. Foron moitas as obras presentadas, todas elas de gran nivel, o que fixo especialmente difícil a tarefa do xurado.

Entre todas, destacaron as tres mellores obras, recoñecidas pola súa orixinalidade, coidado técnico e capacidade expresiva. O primeiro posto foi para Santi, cuxa obra conseguiu conquistar ao xurado pola súa forza e creatividade. Ademais, produciuse un dobre empate no segundo posto, compartido por Sarai e Bruno, que demostraron tamén un excelente nivel artístico.

Parabéns aos tres polo recoñecemento acadado e, por suposto, a todas as persoas participantes. Animámosvos a seguir demostrando as vosas habilidades artísticas, a creatividade e o bo facer, que fan posible iniciativas tan enriquecedoras como esta.

Club de lectura

Seguimos coas reunións dos distintos clubs de lectura que celbramos unha vez por semana durante o recreo.

Nas imaxes vemos ao alumnado de 3º da ESO que este mes está lendo o libro Comerás flores, de Lucía Solla Sobral. A novela conta a historia de Marina, unha xoven que está a atravesar o duelo pola morte de seu pai e ao mesmo tempo inicia unha relación cun home maior. 

O grupo de 2º da ESO leu Invisible e Redes, de Eloy Moreno. Na actualidade están lendo O que sei do silencio de Andrea Maceiras, centrada no tema do acoso escolar.

Xa estamos a organizar a excursión do club de lectura. Este curso estará relacionada co contido do libro A casa da Mina, de Maica Gorgal. Proximamente vos diremos maís... Estade atentxs! 

 

IX Encontro de entroido

 

O podcast que acabamos de publicar é só un pequeno adianto de todo o que está por vir. Un aperitivo sonoro que nos abre a porta ao Encontro de Entroido, unha cita moi especial que reunirá á comunidade educativa de Vila de Cruces nun día cheo de creatividade, convivencia e celebración compartida.

Animámosvos a escoitalo e, sobre todo, a achegarvos ao Auditorio Xosé Casal a partir das 11 aproximadamente, onde terá lugar o encontro intercentros no que participarán o CEIP Plurilingüe de Cerdeiriñas, o CEIP Plurilingüe Nosa Señora da Piedade e o IES Marco do Camballón. O que se escoita no podcast é só unha mostra do talento, da ilusión e do traballo colaborativo que se poderá vivir en directo.

Dádelle ao play, deixádevos contagiar polo ambiente… e preparádevos para gozar dun Entroido que promete ser inesquecible.

Investigando sobre o entroido das Cruces

Ao longo das últimas semanas, o alumnado estivo na procura e recompilación de imaxes vencelladas ao patrimonio cultural do Entroido do Concello de Vila de Cruces, poñendo en valor unha das tradicións máis singulares e identitarias da nosa contorna.

Este traballo enmárcase no Proxecto Son das Cruces, unha iniciativa que o alumnado de 4º de ESO vén desenvolvendo dende o mes de setembro, coa intención de investigar, conservar e difundir a memoria cultural e sonora do municipio. Aínda que o grupo motor do proxecto é este nivel educativo, trátase dun labor colaborativo, no que participa todo o centro educativo a través da realización de entrevistas, da achega de testemuños e

da recollida de fotografías antigas e actuais.

Grazas a este proceso colectivo, o alumnado non só aprende a investigar e documentar o patrimonio inmaterial, senón que tamén se converte en protagonista activo da súa conservación e transmisión ás xeracións futuras. O Entroido de Vila de Cruces soa, vive e continúa grazas a este traballo compartido.

Unha das cuestións que xurdiron durante o traballo de investigación foi saber de que parroquia eran os xenerais que viñan ás Cruces hai arredor de 50 anos. As hipóteses que se manexan inclúen parroquias do propio concello como Bascuas, Brandariz, Duxame, Merza, Piloño, Ollares ou Salgueiros, mais polo de agora non se puido confirmar con certeza a súa procedencia.

Grazas ás imaxes recompiladas e aos testemuños orais, sabemos que en parroquias como Duxame, onde o Entroido deixou de celebrarse nos anos 70, ou Camanzo, cuxas celebracións tiveron lugar nos anos 50, non se conservan fotografías, pero si a memoria dos maiores. Estes lembran que eran entroidos moi animados, con grande participación e moita afluencia de xente.

Cada parroquia contaba cun día propio para celebrar o Entroido, o que convertía estas datas nun auténtico percorrido festivo polo concello:

Merza: domingo de Corredor

Bascuas: xoves de Entroido

Camanzo: venres de Entroido

Piloño: domingo de Entroido

Brandariz (Brandomés): luns de Entroido

Salgueiros e As Cruces: martes de Entroido

Aínda quedan pendentes de confirmar os días correspondentes a Duxame e Ollares, o que amosa que este proxecto segue aberto á colaboración da veciñanza e á recuperación da memoria colectiva.

Entroido en fotos

Leer más publicaciones en Calaméo

Esperamos seguir contando con esta colaboración, que nos axuda a escribir a historia dun concello e das súas parroquias, mantendo viva a memoria colectiva do Entroido do Concello de Vila de Cruces.

Celebramos a creatividade: ‘Os tres músicos’ de Velázquez triunfa no concurso

 Durante o primeiro trimestre, a biblioteca convocou o concurso “Somos artistas”, no que o alumnado tivo a oportunidade de combinar creatividade, arte e traballo en equipo. O reto consistía en decorar a aula e representar un cadro famoso, dando vida ás obras a través da súa imaxinación e esforzo.

O gañador deste ano foi o equipo que elixiu representar o cadro “Os tres músicos” de Velázquez, unha obra emblemática do Barroco. A recreación destacou pola súa atención ao detalle, a fidelidade á obra orixinal e o talento do alumnado para trasladar a pintura á realidade da nosa aula.

Podedes velos disfrutando do seu premio na cafetería do instituto, un momento de recoñecemento e celebración para todos eles.

Parabéns a todos os participantes por poñer en práctica a súa creatividade e a súa pasión pola arte! Esperamos con ilusión as próximas edicións do concurso.

Novas ilustracións na biblio!

Xa temos na biblioteca algunhas das impresionantes ilustracións que chegaron para participar no noso concurso. O reto? Facer unha caricatura, debuxo ou ilustración dun artista, pintor/a, cantante ou escritor/a...  que te inspire.

Non hai límites á creatividade: cada participante puido deixar voar a imaxinación e compartir a súa visión única dunha persoa que admire.

E atención: hai dous premios para as mellores obras, e son canxeables na cafetería do instituto!  Así que vale a pena deixar a túa pegada artística.

Pasade pola biblioteca e botádelle un ollo a estas obras fantásticas. Tamén podedes vela no Calaméo desta publicación, por se queredes revisalas desde calquera lugar. Quen sabe? A túa tamén podería ser unha das gañadoras!

Ilustracións

Leer más publicaciones en Calaméo

O alumnado do IES Marco do Camballón mergúllase no Alto dos Xenerais de Salgueiros

O alumnado do IES Marco do Camballón está a vivir o Entroido desde dentro participando no Encontro Intercentros. Estes días atópanse ensaiando os personaxes máis representativos do Alto dos Xenerais de Salgueiros, unha das expresións máis singulares do noso Entroido tradicional.

Centinela, correo, xenerais, moros, frade e alcalde van collendo forma grazas ao traballo do alumnado, que conta ademais coa axuda e o acompañamento de membros do Carnaval de Salgueiros. Xuntos están a compartir saberes, tradición e moita ilusión para manter viva esta celebración tan nosa.

Saúde Mental

Iniciamos os obradoiros sobre saúde mental coa Asociación Fonte da Virxe.

Desta volta tocoulle o turno ao alumnado de 4º da ESO e 1º e 2º curso do CM de Atención a persoas en situación de dependencia. Aprendemos sobre a importancia do benestar emocional, a coidarnos e a coidar aos demais. Nos cursos de formación profesional abordamos ademais o tema dende a perspectiva da saúde laboral. Nesta ligazón podedes consultar o resumo gráfico das sesións.

Esta actividade está incluída na liña de benestar emocional dentro dos proxectos de inclusión educativa convocados pola Consellería de Educación.

Universidade: USC e PAU

Participamos no programa "A ponte entre o ensino medio e a USC" coa visita de J.M Blanco, que informa ao alumnado de 1º de Bacharelato sobre a Universidade de Santiago e as PAU. 

Visita guiada cos alumnos de Ciclo Medio de Soldadura e Caldeirería á empresa CITIC CENSA en O Porriño

 O pasado 28 de xaneiro, os alumnos do Ciclo Medio de Soldadura e Caldeirería tiveron a oportunidade de visitar as instalacións da empresa CITIC CENSA, situada en O Porriño. Esta empresa está especializada na fabricación de maquinaria pesada, destacando en sectores clave da industria como a minería, a enerxía e a construción.

Durante a visita, o alumnado puido coñecer de primeira man a fabricación de equipos de gran envergadura, entre os que destacan:

Tuneladoras, utilizadas na construción de grandes proxectos subterráneos.

Muíños para cementeiras e extracción de minerais, fundamentais para a industria da construción e a minería.

Turbinas para centrais hidráulicas, que contribúen á produción de enerxía renovable.

A xornada permitiu aos estudantes observar de cerca os procesos de soldadura e caldeirería aplicados á maquinaria pesada, así como comprender a importancia da precisión e da tecnoloxía no deseño e fabricación destes equipos. Ademais, serviu para motivar ao alumnado e mostrarlles posibles vías de desenvolvemento profesional dentro do sector industrial.

Agradecemos á empresa CITIC CENSA a súa disposición e dedicación para amosar o seu traballo e formar aos futuros profesionais da soldadura e a caldeirería.

Que a dor allea non nos sexa indiferente: Día da Paz no Camballón

 Hoxe conmemoramos o Día da Paz no noso centro, unha xornada para parar, reflexionar e mirar de fronte unha realidade que este curso estamos a traballar especialmente: a guerra e os conflitos no mundo.

Como di esta fermosa versión da canción “Solo le pido a Dios”, a guerra é un “monstro grande e pisa forte toda a pobre inocencia da xente”. Unha mensaxe clara que nos convida a non ser indiferentes ante a dor, a inxustiza e o sufrimento de tantas persoas inocentes.

Con este espírito, elaboraron un mural sobre as guerras e conflitos actuais, co obxectivo de concienciar a toda a comunidade educativa sobre a situación do mundo e a importancia de construír a paz desde o respecto e a solidariedade.

Ao redor deste tema xiron tamén as actividades das titorías, pensadas para conmemorar o Día da Paz e
fomentar a reflexión, o diálogo e o pensamento crítico no alumnado.

Sen dúbida, o ser humano non pode mirar cara outro lado: a violencia e a violación dos dereitos humanos nunca poden estar por riba do respecto, do diálogo e da vía diplomática.

Agardamos, con este traballo, espertar conciencias e contribuír a desenvolver un espírito crítico e comprometido no noso alumnado, porque a paz constrúese cada día, tamén desde a escola.

Porque a paz non é só a ausencia de guerra, senón a presenza da xustiza, do respecto e da empatía. Desde a escola queremos lembrar que cada pequeno
xesto conta e que educar para a paz é educar para a vida. Que a dor allea non nos sexa indiferente e que nunca deixemos de crer que un mundo máis xusto e en paz é posible.

Día do crebacabezas

 

No día do crebacabezas, atopamos ao alumnado traballando sen descanso para rematar este cadro de 1000 pezas....  conseguiramos antes de que remate o curso?
Xa vos teremos informadas e informados?