O Día das Letras Galegas 2027, adicarase a unha figura moi especial para a nosa comunidade: Xosé Neira Vilas, un dos escritores máis recoñecidos do noso concello. A súa obra e o seu compromiso coa lingua e coa cultura galega convérteno nun referente imprescindible, e para o noso IES é un motivo de orgullo celebrar esta homenaxe tan próxima e sentida.
Neira Vilas soubo dar voz, con sensibilidade e verdade, á vida da xente do rural galego. A través de Balbino, o protagonista de Memorias dun neno labrego, achegounos a mirada limpa e sincera dun neno da aldea, que observa o mundo con curiosidade, xustiza e tamén esperanza. Balbino non é só un personaxe: é un símbolo de toda unha xeración e dunha forma de vivir que forma parte da nosa identidade.
Para o noso centro educativo, esta celebración ten un significado especial. Non só recoñecemos a traxectoria dun grande escritor, senón que tamén reivindicamos as nosas raíces, a nosa lingua e a nosa cultura.
Ao lembrar a Neira Vilas, lembramos tamén a importancia de manter viva a lingua galega e de seguir creando, lendo e compartindo en galego. Porque, como nos ensinou Balbino, mesmo desde unha pequena aldea pódense contar historias que chegan ao corazón de todo un pobo.
Durante o mes de maio o alumnado de 4º ESO e 1º de Bacharelato participou nunha andaina a Toiriz enmarcada no Proxecto Ríos. Guiados por Alberto, chegamos á area recreativa, donde os nosos rapaces e rapazas estudaron a fauna, a flora e calidade da auga. Durante a xornada leváronse a cabo análises en situ, por exemplo, do pH e da concentración de sulfatos e nitratos. Estas análisis completáronse con outras no laboratorio do centro, nas
que se determinaron, entre outros, os cloruros. En fin, foi unha xornada de disfrute na que, ademais de fomentar a actividade física e o coidado do medio ambiente, se puxeron en funciamento capacidades científicas como a observación, a experimentación e extracción de conclusións.
"Neogaleg@s. @s nov@s fill@s da lingua" é o documentario que estivemos a gravar como actividade final da Aula de Acollida Lingüística do IES Marco do Camballón con alumnas e alumnos recén chegados. As súas reflexións sobre a nosa lingua foron brillantes e sorprendentes. Nerea Fiúza, exalumna e colaboradora do Clube da Lingua, está ao mando do documentario. Sempre é unha garantía de calidade superior o teu traballo, compañeira!
Tamén estivo botando unha man Sara, a mestrinha, que trouxo uns diplomas de OG, Orixinal Galego, para este alumnado que xa se sente galego. A nosa lingua é fundamental para unha socialización equilibrada.
Laura Lamontagne veu presentar o seu último disco ao festival de fin de curso. E dinamizou unha festa de regueifa con autotune na que participaron as alumnas e alumnos regueifeiros do Camballón.
Onte, o IES Marco do Camballón viviu un deses momentos que quedan gardados para sempre na memoria da nosa comunidade educativa: a graduación do alumnado de 2º de Bacharelato.
Foi unha tarde chea de emocións compartidas, de lembranzas que afloraban en cada palabra e de sorrisos que agochaban tamén algunha bágoa. O alumnado protagonista desta xornada puxo voz á súa propia historia, relatando a súa etapa no instituto: anos de aprendizaxe, de amizades que medraron co tempo, de retos superados e de soños que comezaron a tomar forma entre estas paredes.
Nos seus discursos, non faltaron as palabras de agradecemento ao profesorado, ás familias e a todas as persoas que, dun xeito ou doutro, formaron parte deste camiño. Pero tamén houbo espazo para o humor, para as anécdotas compartidas e para esa complicidade que só nace despois de tantos anos vividos xuntos.
A graduación non é un final, senón un punto e seguido. Agora, cada un e cada unha deles emprende novos camiños: estudos universitarios, formación profesional, experiencias vitais que os levarán a descubrir o mundo e a si mesmos. Levan consigo non só coñecementos académicos, senón tamén valores, recordos e vínculos que permanecerán no tempo.
Dende o IES Marco do Camballón queremos desexarlles toda a sorte nesta nova etapa. Sabemos que están preparados e preparadas para afrontar os desafíos que veñan, con responsabilidade, ilusión e espírito crítico.
O IES Marco do Camballón celebrou a graduación do alumnado de 4º da ESO, un momento moi especial que marca o peche dunha etapa importante e o inicio de novos retos.
Foi unha xornada cargada de emoción, na que o alumnado lembrou os anos vividos no centro: os primeiros días cheos de incertezas, as amizades que se foron consolidando co paso do tempo, as aprendizaxes dentro e fóra da aula e todas esas experiencias que os fixeron medrar como persoas.
Ao longo do acto, non faltaron palabras de agradecemento ao profesorado e ás familias, así como anécdotas e recordos compartidos que arrincaron máis dun sorriso entre o público. Foi, sen dúbida, un momento para celebrar todo o camiño percorrido e recoñecer o esforzo realizado.
A partir de agora, ábrense novos horizontes. Moitos dos nosos alumnos e alumnas continuarán a súa formación no propio centro, xa sexa cursando Bacharelato ou incorporándose a algún dos ciclos formativos que se imparten no IES Marco do Camballón. Outros emprenderán camiños diferentes, pero todos levan consigo a pegada desta etapa e todo o aprendido ao longo destes anos.
Dende o centro queremos felicitalos polo acadado e animalos a seguir avanzando con ilusión, compromiso e confianza nas súas capacidades.
Parabéns, promoción 2026! O futuro está nas vosas mans… e este sempre será o voso lugar.
A comunidade educativa do IES Marco do Camballón de Vila de Cruces rendeu hoxe unha emotiva homenaxe a Delia García Lagos, integrante da área de Administración, con motivo da súa xubilación.
Tras 28 anos de dedicación ao centro, Delia despídese deixando unha fonda pegada grazas á súa profesionalidade, compromiso e trato próximo. Ao longo deste tempo foi unha figura moi querida polos distintos equipos directivos, así como polo conxunto do profesorado, alumnado e persoal non docente.
O acto estivo cargado de emocións. Alumnado e persoal do instituto formaron un corredor humano para despedila entre aplausos. A continuación, tras unhas palabras de recoñecemento, fíxoselle entrega dun ramo de flores e dunha placa conmemorativa co nome «Espazo Delia García», que será colocada no seu despacho como lembranza permanente do seu paso polo centro.
Con este sinxelo pero sentido acto, a comunidade educativa quixo agradecerlle todos estes anos de traballo e dedicación, desexándolle o mellor nesta nova etapa da súa vida.
O alumnado de 4º da ESO -Lucía, Olalla, Lucía, Xiana - participante no Proxecto Son das Cruces realizou unha enriquecedora saída a Santiago de Fontao, culminando así o traballo desenvolvido ao longo de todo o curso.
Nesta ocasión, foron as propias alumnas e alumnos quen se converteron en guías, encargándose de dirixir a ruta dende o Cruceiro de Aguiar ata o antigo poboado mineiro. Ao longo do percorrido, compartiron cos seus compañeiros e profesorado todo o coñecemento adquirido, ofrecendo explicacións moi completas e interesantes.
Durante a visita, achegáronnos á toponimia da parroquia e á súa historia mineira, un dos elementos máis significativos da zona. Tamén falaron das distintas escolas que existiron, da desaparecida capela de San Antonio e da igrexa parroquial xacobea, así como da igrexa do poboado mineiro.
A ruta continuou por fermosas carballeiras que forman parte da paisaxe natural do lugar. Ademais, tiveron ocasión de coñecer espazos tan singulares como as antigas cárceres, o cuartel da Garda Civil, a casa dos enxeñeiros, antigo camiño romano, baños medicinais, pasando e a casa dos xefes da mina.
Un dos puntos máis curiosos foi a visita a un dos antigos cines da zona, hoxe reconvertido en auditorio, que serviu tamén para descubrir como era a vida social da época.
Foi unha mañá moi completa, chea de información, aprendizaxe e descubrimentos, na que tamén puideron ver fotografías antigas que lles permitiron comprender mellor a evolución do lugar ao longo do tempo.
Sen dúbida, unha experiencia moi valiosa que puxo en práctica todo o traballo realizado no proxecto e que contribuíu a reforzar o coñecemento e o orgullo polo patrimonio máis próximo.
No marco do proxecto Son das Cruces, o alumnado de 4º da ESO realizou unha fermosa ruta pola parroquia de Santa María de Ollares, unha oportunidade única para coñecer de primeira man a riqueza natural, histórica e cultural da nosa contorna máis próxima.
A andaina comezou na Igrexa, situada na Cima da Vila, un lugar cargado de simbolismo dende o que se inicia o percorrido. Alí fixemos unha primeira parada para beber na fonte que leva o nome do lugar, recuperando así un pequeno xesto da tradición local. Dende este punto, puxemos rumbo cara á Costa, pasando pola fonte de Ollares, onde antigamente se situaba a escola da parroquia á que acudían nenos e nenas doutros tempos.
O camiño levounos a atravesar varias carballeiras, espazos de gran valor ambiental e paisaxístico, ata chegar a un fermoso merendeiro e á Aula da Natureza, situada á beira do encoro. Foi un momento ideal para descansar, compartir e gozar da contorna.
A continuación, emprendemos o regreso pola Chousa Vella, bordeando o encoro e pasando por novas carballeiras con árbores senlleiras que deixaron pegada no grupo pola súa beleza e singularidade. O percorrido levounos de volta á aldea, completando así unha ruta circular chea de descubrimentos.
A actividade rematou no lugar de Casas Novas, onde visitamos a capela de San Gregorio, pechando a xornada cun último achegamento ao patrimonio da parroquia.
Esta ruta pode consultarse en Wikiloc grazas ao traballo de Xiana, David, Almudena e Lucía, a quen queremos agradecer a súa colaboración.
Unha experiencia enriquecedora que nos permitiu coñecer mellor o noso territorio, valoralo e sentirnos parte del.
O alumnado de 4º da ESO Fabián, Elena e Xoel participou recentemente nunha saída didáctica dentro do proxecto Son das Cruces, unha experiencia que nos permitiu coñecer de primeira man o patrimonio histórico e cultural da nosa contorna.
A ruta comezou no lugar da Cima da Aldea, dende onde iniciamos o percorrido por unha fermosa corredoira que nos levou ata Foxacos. Durante o traxecto, o alumnado puido observar elementos propios da paisaxe tradicional galega, así como reflexionar sobre a importancia de conservar estes espazos.
A continuación, desprazámonos ata Madrosende, onde visitamos a antiga escola de nenas. Neste mesmo lugar achegámonos á Igrexa de San Xoán, un templo de grande interese histórico, construído no século XII e que sufriu diversas reformas no século XVIII. Trátase dunha igrexa de unha soa nave cun ábside, na que destaca o altar, presidido por unha cruz datada no ano 1932. Tamén chamaron a atención as súas campás: a máis grande, de 1881, e a pequena, de 1880. Aqui atopamos un castiñeiro senlleiro.
O percorrido continuou pasando polo cruceiro da Senra en dirección a Fafias. Neste lugar atopamos un interesante elemento arquitectónico: a parte superior do portal dunha casa de pedra, coñecida como dintel ou cargadoiro, datada en 1771. Fafias foi tamén un punto importante na vida social da zona, xa que alí
se celebraba a feira das mazarocas. Ademais, antigamente acollía a escola dos nenos e conserva outro cruceiro que forma parte do patrimonio local.
Seguimos a ruta pasando pola fonte do lugar ata chegar á área recreativa, onde puidemos observar unha antiga inscrición, hoxe xa ilexible, que esperta a curiosidade sobre o pasado deste espazo.
Na aldea inda quedan moitos hórreos, construccións onde se gardaba o millo.
Finalmente, regresamos ao punto de partida, pechando así unha xornada enriquecedora na que o alumnado non só coñeceu mellor a súa contorna, senón que tamén valorou a importancia de preservar o noso patrimonio cultural e histórico.
"AS MULLERES DO VOLFRAMIO" é o traballo de investigación, enmarcado no Proxecto "Donas de si", no que o alumnado do noso centro estivo a traballar durante este curso.
A investigación centrouse na actividade mineira dos xacementos da Brea, en Fontao, un dos epicentros mineiros máis importantes de Galicia, nos anos 40 coincidindo coa Segunda Guerra Mundial.
O volframio extraído converteuse nun material moi cobizado pola industria armamentística e, aínda que historicamente invisibilizadas durante a "febre do ouro negro", as MULLERES xogaron un papel fundamental.
Foron as MULLERES as que sostiveron a economía e o funcionamento diario do complexo industrial pero, tamén, social..
Con estes traballos quixemos rescatar e lembrar o seu protagonismo como un dos piares fundamentais da memoria histórica de Galicia.
Traballos de "AS MULLERES DO VOLFRAMIO", pertencentes ao proxecto da Xunta, "DONAS DE SI" co que se pretende visibilizar e poñer en valor o protagonismo das mulleres na configuración da sociedade galega.
No día a día do noso instituto hai moitas tarefas que non sempre se ven, pero que son fundamentais para que todo funcione e teña vida. Hoxe queremos facer un recoñecemento moi especial ao noso voluntariado da biblioteca e da radio, un grupo de alumnado que, co seu compromiso e dedicación, contribúe a facer do centro un lugar mellor.
Comezaron sendo moitos e moitas máis, pero como adoita pasar, o paso do tempo foi reducindo o grupo. Por iso queremos destacar aínda máis o labor daqueles e daquelas que se mantiveron ata o final, demostrando responsabilidade, constancia e ilusión.
Eles e elas son quen de decorar espazos, colocar fondos, xestionar préstamos, recomendar lecturas, asesorar a outros compañeiros e compañeiras, facer podcast, emitir en directo nos recreos… e, en definitiva, dar vida á biblioteca e á radio escolar, converténdoas en espazos dinámicos, útiles e acolledores para toda a comunidade educativa.
Este recoñecemento que facemos dende o equipo da biblioteca vese tamén avalado pola Consellería, que valora este labor cun diploma que acabamos de entregar como mostra de agradecemento e posta en valor do seu traballo.
Grazas por todo o que achegades, pola vosa implicación e polo voso tempo.
Esperámosvos o vindeiro curso para seguir facendo medrar, entre todos e todas, estes espazos tan importantes do noso instituto.
A publicación, elaborada polo alumnado de 2º de Bacharelato, será presentada o vindeiro 16 de xuño nun acto aberto ao público coa participación da matemática Elena Vázquez Abal.
O Departamento de Matemáticas do IES Marco do Camballón vén de publicar o sétimo volume de MARCO NUMÉRICO, a revista de investigación matemática elaborada polo alumnado da materia Métodos Estatísticos e Numéricos de 2º de Bacharelato.
Trátase dun proxecto educativo consolidado no centro que, ao longo dos últimos anos, permitiu ao alumnado desenvolver investigacións propias arredor de cuestións de actualidade mediante a aplicación de ferramentas estatísticas e modelos matemáticos. A iniciativa combina a aprendizaxe dos contidos da materia co desenvolvemento de competencias científicas, documentais e comunicativas, achegando o alumnado aos procesos propios da investigación académica.
Nesta nova edición recóllense dez artigos que abordan problemas e fenómenos de ámbitos tan diversos como a ciencia forense, a meteoroloxía, o deporte, a ecoloxía mariña, a microbioloxía, o mercado laboral, a astronomía, a percepción humana ou a intelixencia artificial. Os traballos aplican conceptos como o teorema de Bayes, as cadeas de Markov, os modelos binomiais e normais ou as técnicas de estimación estatística para analizar situacións reais desde unha perspectiva matemática.
Como é habitual en todos os volumes da revista, o limiar está asinado por unha personalidade destacada da comunidade científica galega. Nesta ocasión, a autora convidada é Elena Vázquez Abal, catedrática da área de Xeometría e Topoloxía da Universidade de Santiago de Compostela, unha das matemáticas galegas de maior prestixio e recoñecemento no ámbito da investigación e da divulgación científica.
Os artigos incluídos neste sétimo volume son:
● Culpábel ou inocente? Estudo bayesiano da evidencia forense
● Valor preditivo das alertas de tormenta en Galiza. Bayes contra o lume
● Cando o VAR intervén. O teorema de Bayes na análise de decisións arbitrais
● O ciclo de nitróxeno en ecosistemas mariños galegos. Un modelo markoviano
● Evolución microbiana: aplicacións de Markov na aparición de superbacterias
● Fluxos no emprego: análise da dinámica laboral española mediante cadeas de Markov
● Do tránsito á confirmación: modelando deteccións de exoplanetas con binomial e normal
● A percepción humana da temperatura: estimación do erro medio na avaliación térmica
● Como nos engana a intelixencia artificial? Estimación da proporción de acertos na identificación de imaxes
● Velocidade de reacción ante estímulos visuais: estimación da media mediante intervalos de confianza
A presentación oficial da revista tivo lugar onte na Biblioteca do IES Marco do Camballón. O acto contou coa participación do alumnado autor dos traballos, profesorado do centro e da propia Elena Vázquez Abal, que compartirá co público asistente a súa visión sobre o papel das matemáticas e da investigación na sociedade actual.
Con esta iniciativa, o IES Marco do Camballón reafirma a súa aposta por unha educación baseada na investigación, no pensamento crítico e na divulgación científica, fomentando entre o alumnado o interese polas matemáticas e a súa aplicación aos retos do mundo contemporáneo.
A economía está presente no noso día a día, aínda que ás veces non sexamos plenamente conscientes diso. Detrás de cada decisión, de cada prezo, de cada elección de consumo, hai conceptos e dinámicas que explican como funciona o mundo que nos rodea.
Con esta idea nace o podcast de Economía elaborado polo alumnado de 1º de Bacharelato: un espazo de reflexión, aprendizaxe e comunicación no que os estudantes se converten en protagonistas, investigando, analizando e explicando temas económicos de actualidade dun xeito claro e próximo.
O alumnado de 4º de ESO de Intelixencia Artificial para a Sociedade gravou durante este curso uns programas de radio onde resumían parte dos contidos traballados na materia. Escoitando estes programas pódense aprender novas palabras relacionadas co mundo da IA, acontecementos históricos que marcaron o desenvolvemento deste ámbito, coñecer diversas aplicacións da IA no mundo real e reflexionar sobre as implicacións éticas e o debate moral que supón o seu uso. Todo iso ademáis acompañado dalgunha que outra curiosidade, recomendación ou mesmo algún chiste!
Nos últimos días, o alumnado de 4º de ESO tivo a oportunidade de achegarse a unha decisión importante para o seu futuro académico e profesional: coñecer de primeira man os ciclos formativos que se ofertan no noso instituto.
A visita centrouse especialmente en dúas opcións con grande proxección: o ciclo de Soldadura e Caldeirería e o de Atención a Persoas en Situación de Dependencia. A través desta experiencia, o alumnado puido descubrir non só os contidos que se traballan en cada un deles, senón tamén as habilidades prácticas, os valores e as saídas profesionais que ofrecen.
No ciclo de Atención a Persoas en Situación de Dependencia, da man de Imanol, o alumnado coñeceu unha formación centrada no coidado, na empatía e no acompañamento de persoas que precisan apoio no seu día a día. Achegáronse a situacións reais e comprenderon a importancia social e humana desta profesión.
No obradoiro de Soldadura e Caldeirería, dirixido por Lois e alumnado do ciclo, observaron de preto o traballo con metais, as técnicas de unión e fabricación e a importancia da precisión e da seguridade neste ámbito. Foi unha ocasión para romper prexuízos e valorar unha profesión técnica con moita demanda no mercado laboral
